Jed´s Joahr zua Floriani-Zeit,
aum 4.Mai – es is soweit.
Traditionell – zum x´tn Moi,
is Kirtag im schenen Garstnertoi.
Do is für jed´n wos zan hob´n,
ob´s braucht wird, tuat do koana Frog´n.
Heuer is a Saumstog g´wen
und i tua mit mein Enkal geh´n.
Dawei die Mama d´Frisur lost styl´n,
tuan mia zwoa zan Kirtag eil´n.
I red´ ihr vorher no ins G´wiss´n,
z´erst tan ma schauen und genieß´n.
Daun erst kaunst dein Wunsch mia sog´n,
natürlich derfst wos Schönes hob´n.
Wia ma do so eini geh´n,
siacht´s scho s´erste Spüzeug steh´n.
Vaständlich – sie wü´s glei besitz´n,
STOPP sog i und komm´ ins schwitz´n.
Tuan ma erstmoi´ durch maschier´n,
sie tuats zum Glück brav akzeptier´n.
Mei Wunsch – so tuat mei Enkerl sog´n,
is kloar – i wü a Barbie hob´n.
Doch von dei´ gibt’s do an Hauf´n,
sie würd´ aum Liabst´n alle kauf´n.
Und a no Kleida – für sie zan trog´n,
„Oma – derf i des do hob´n?“
frogt mei Enkal und blickt ma in d´Aug´n,
gaunz süaß tuat´s Madl zu mi schau´n.
Do z´rinnt mei Herz – tiaf tua i schnauf´n,
nimm´s Göd und tua des Kleidal kauf´n.
Ban z´ruck geh´n is es daun soweit,
a Barbie mit Prinzessin – Kleid,
die Kloane greift glei hin voi Freud´,
des is a schena Kirtog heut´.
Und ois Draufgob´- wos soi i sog´n,
gibt’s no an Einhorn – Luftballon.
Jetzt is sie glücklich – so a Seg´n,
für mi kaun´s goa nix schöner´s geb´n.
Zufried´n – mit all´ dem Spüzeug daun,
tret´n mia zwoa die Heimfoahrt aun.
OMA – sogt´s Enkal und tuat herzlich Lach´n,
toll woar´s – des müaß ma boid wieda moch´n.