Wia vü´gab´ i heut´ in meinem Leb´n ,
wann da Hergott mia z´ zruck die Oma kunt´ geb´n.
Als kloanes Kind is woarm mia word´n,
wann´s druckt mi hat in Ihre Arm.
A jed´s Problem und woar´s no so groß,
hat sie g´wiess g´schauck´lt – ganz mühelos.
Hot a Menge mia bei b´racht, als i woar no a Kind,
hab vüll net verstand´n, jetzt woas i – es stimmt.
A Herz voller Liab´- meist a Lach´n im G´sicht,
wia gern hob i ihr zua g´herart, wanns mia erzählt´ hot a Gschicht.
Ganz spannend hot´s ang´fangt: „Wia i bin geborn´,
tja, die Zeit woar do anders – in die Zwoanziga Joahrn.“
„mei Kindheit!“ – so erzählt sie – „ de woar scho vorhand´n,
und hot a net nur aus Arbeit bestand´n!“
„Sunntog´s zum Beispiel – noch da Mess´ und dem Ess´n,
do san mia Kinder oft z´sammen gesess´n.
Hab´n g´sungan und tanzt oft bis mitt´n in d´Nacht,
jo, jo s´war scho lustig – und wia hab´n a vü g´lacht.“
d´Oma muas Lachn – es schaut aus ois tat´s ebn,
dies´n lustig´n Moment no oanmol a´lebn.
Wia i grösser bin word´n – do woar mei bestrebn,
meina Oma ganz vüll Unterstützung zu geb´n.
A des wor net immer – i muaß´ grod´ gesteh´n,
des aller leichteste in mein Leb´n.
Akkurat – wann grod´koa Zeit wor vorhand´n,
is auf oamol do vor mia gestand´n.
Doch meist´ns hot´s g´habt, an guat´n Schmäh´,
bis i Zeit g´hobt hob – zumindest für an Häferl Kaffee.
Freitag´s zum Einkauf´n foahrn,
do is maunchmal a später word´n,
bis von da Oarbat i hoam bin kemma,
des konnt´ sie mia manchmal recht übl nemma.
Gaunz bös woar ihr Blick – koan Ton hot sie g´sagt,
mi hat des schlechte G´wissn schia´ backt.
Doch Gott sei Dank nach a poar Minut´n,
hab´n ma dann beide die Sprach´ wieder g´fund´n.
Jed´n Sunntog, do woar´s zan Kiacha foahn,
a do bin i oft ganz schen fuchtig word´n.
Koa Zeit für mi selber – oiweil hoaßt´s nua springa,
heut´ hätt´i sie g´hobt – doch heut´ d´Oma is nimma.
Tiaf drin in mein Herz´n san ma auf ewig verbunden,
denn dort hot mei Oma ihr Platzerl g´fundn.