Boid um is Joahr – du liabe Zeit,
Weihnochtn is net mehr weit.
Aum Adventkruanz d´Kerzn brennan,
di stülle Zeit – jetzt kaun si kemman.
Schneeflock´n foll´n vom Himmelszelt,
hernieda auf die Erdnwelt.
Bringan uns Besinnlichkeit
und d´Hoffnung allen weit und breit.
Losst´s zua des G´fühl – sperrts eam net zua,
dem Jesuskind – dem kloanen Bua.
Jed´s Joahr – i hoff´ es wird gelingan,
wü er die Liab uns ins Herz einibringan.
Geb´n ma uns d´Haund – wünsch´ ma uns Glück
und hoi´n ma uns den Fried´n z´rück.
Setz ma uns zaum in froha Rund´n,
vabringan so besinnlich´ d´Stund´n.
Mit ehrlich´ aufrichtigem Sinn,
mia olle geh´n zua Kripp´n hin.
Bringan den Kumma – unsre Sorg´n,
zum Kinderl hoit – zum Neugebor´n.
Di Engerl mit Musik und Klaung,
nehman uns herzlich in Empfaung.
Geb´n uns des G´fühl, an Wert zan hobn,
do zu sein, in ollen Log´n.
Und für a Hilfe, hier auf Erd´n,
wir olle soll´n hier Helfer werd´n.
A jeder hot a Haund zan Trog´n
und a, a Zweite für die Gob´n.
Weihnocht´n – es mög´ uns gelingen,
das wir uns olle nur Freude bringen.